Byose ni kuri Nyirangarama
Order: +250 788 305 122 / 788 136 999
IMG-LOGO

Sina Gérard yongeye gukura ikindi gikombe mu Budage

Home / #
IMG-BLOG
03 Comment 15 Viewer Dec 16 ,2017

Sina Gérard yongeye gukura ikindi gikombe mu Budage

Ku mugoroba wo kuri uyu wa Kabiri nibwo Sina Gérard n’umugore we bageze ku Kibuga cy’Indege Mpuzamahanga cya Kigali i Kanombe bakubutse mu mujyi wa Berlin mu Budage aho bari bagiye kwakira igikombe ku bw’ikorahabuhanga, guhanga udushya n’ubwiza bw’ibyo bakora.

Iki gihembo bahawe kuwa 26 Werurwe 2012 cyitwa ’The new Era Award for Technology, Quality and Innovation’, bagihawe n’ihuriro ryitwa ’Association Other ways Management and Consulting’, rifite icyicaro i Paris mu Bufaransa.

Aganira n’abanyamakuru Sina yagize ati :" Ibyishimo byo ni ngombwa ; kwakira igikombe nk’iki duhawe n’ikigo mpuzamahanga ku bw’ibyo dukora nk’Agashya, Akabanga, Akarusho n’ibindi dukora ndetse n’ibindi bishya tugenda tugeza ku Banyarwanda buri mwaka. Aba bahanga bakoze ubushakashatsi basanga Entreprise Urwibutso yujuje Ubwiza, Ikoranabuhanga no guhanga Udushya bituma ishyirwa mu ruhando rw’Isi iranabishimirwa".

Sina Gérard avuga kandi ko buri mwaka bagira ikintu gishya bashyira hanze nk’aho mu mwaka ushize bari barashyize ahagaragara divayi ikomoka ku mizabibu ndetse yaje no guhabwa igikombe kivuye mu Bwongereza, muri uyu mwaka rero harashyirwa hanze amazi akomoka mu misozi ya Nyirangarama yiswe ’Akandi’.

Iki gikombe Sina Gérard yagihawe ari kumwe n’abandi baturutse mu bihugu bisaga 30 byo hirya no hino ku Isi, akaba agihawe nta rushanwa ribayeho kuko habanje kurebwa ibikorwa bya Entreprise Urwibutso ndetse banagendeye ku buziranenge budahinduka bw’ibikorwa n’iyo Entreprise.

Umugore wa Sina Gérard ariwe Sina Uwicyeza Olive wari wamuherekeje nawe yatangaje ko ibihembo nk’ibi bibongerera imbaga mu byo bakora ndetse bikaba ari ishema ku gihugu no ku muryango by’umwihariko.

Si ubwa mbere Sina ahabwa ibihembo biturutse hanze y’igihugu, kuko nko mu mwaka wa 2006 nabwo yari yakuye igikombe mu Budage i Frankfurt, mu mwaka wa 2006 kandi yari yakuye ikindi gihembo mu Busuwisi, mu w’2008 yakuye igihembo mu Bufaransa, mu mwaka wa 2011 akura ikindi mu Bwongereza none muri uyu wa 2012 yongeye gukura ikindi mu Budage.

Uretse ibi bikombe kandi Sina yaherewe ku mugabane w’u Burayi, yanahawe ibindi bihembo birimo icyo yaherewe muri Kenya mu w’2009, ndetse n’icyo yaherewe mu gihugu cya Uganda mu mwaka wa 2004, tutanibagiwe na byinshi yagiye ahererwa mu Rwanda cyane cyane aho aba yitabiriye amamurikagurisha haba muri Kigali ndetse no hirya no hino mu Ntara z’u Rwanda.

Sina yatangiye ubucuruzi mu w’1983 ubwo yari afite imyaka 20, acuruza butiki na resitora, mu w’1987 nibwo yashyize ku isoko Urwibutso naho mu mwaka w’1993 ashinga Entreprise Urwibutso ubwo yari amaze kubona ibikorwa bye bimaze gufata umurongo, aha intego Urwibutso kongerera agaciro umutungo kamere ukomoka mu cyaro.

Mu mwaka w’1996 nibwo yabonye ko umutungo kamere utunze Abanyarwanda ari ubutaka, yahise ajya mu buhinzi n’ubworozi kugirango ahinge bitandukanye n’uburyo abantu bahingaga hagamijwe kubyaza umusaruro ibikorwa yakoraga, ndetse no gusagurira amasoko, kugirango abashe kubibyaza umusaruro yarabihinduraga akabyongerera agaciro.

Mu 1999 nibwo Sina yatangiye gushyira mu bikorwa ibijyanye no guhindura umusaruro, atangira gukora umutobe w’Agashya ukomoka kuri Maracuja. Mu mwaka wa 2000 nibwo Sina yatangiye gukora umutobe ukomoka ku nanasi no ku nkeri. Mu 2001 nibwo yatangiye gukora divayi ikomoka ku bitoki yise Akarusho.

Sina Gérard ntiyagarukiye aho kuko mu mwaka wa 2002 yakoze comfiture ikomoka ku nkeri n’inanasi, muri uwo mwaka kandi nibwo yashinze ishuri ’College Fondation Sina Gérard’ mu guha amahirwe abana b’abahinzi borozi kugirango bakurikire inyigisho n’uburyo bwo gufasha ako gace kugirango kazabone abana bize bashobora kubyaza umusaruro umutungo bafite.

Mu mwaka wa 2003 urusenda rwari intica ntikize rwongerewe agaciro maze afata icyemezo cyo kurubyazamo umushongi maze ibitunganyije abyita Akabanga. Mu mwaka wa 2005 nibwo Sina yahinduye ibikomoka ku mafu y’ibinyampeke maze ibyita Akanozo. Mu mwaka wa 2006 hafashwe icyemezo cyo kwagura no kuvugurura uruganda, hashyirwamo imashini zigezweho zujuje ubuziranenge kugirango ashobore kubona uko yongera ibicuruzwa byoherezwa mu mahanga. Mu mwaka wa 2007 nibwo yabonye icyemezo cy’ubuziranenge mpuzamahanga ISO, kimwemerera kuba yakohereza ibicuruzwa bye mu mahanga.

Mu mwaka wa 2009 nibwo Sina yakoze ibisuguti byitwa Akarabo, naho mu mwaka wa 2010 ashyira hanze yoghurt yiswe Akaryoshye. Mu mwaka wa 2011 yakoze divayi ikomoka ku mizabibu ihingwa kuri Nyirangarama, naho muri uyu mwaka wa 2012 akaba ateganya gusohora amazi yitwa ’Akandi’.

Kugeza ubu Entreprise Urwibutso ifite abakozi bagera kuri 365 bahoraho, hakaba n’abandi ba nyakabyizi bagera kuri 500. Muri bo abarangije kaminuza basaga icumi, na benshi bize amashuri bisumbuye.

Entreprise Urwibutso ifite amashami hirya no hino mu Rwanda i Rubavu, Musanze, Kigali, Muhanga, Huye, na Kayonza, ikagira n’icyicaro kuri Nyirangarama mu Karere ka Rulindo mu Majyaruguru y’u Rwanda.